Posted on 04 March 2019
Lungzarhtum Sele, a khaw mi te leh Zoram mipui ten an ngaihven a, an ngaihhlut êm êm thihdan phung pangngai loa a thi hi BIOCONE chuan pawi a ti takzet a, a thihna chhan dik tak hi chiang taka chhui chhuaka hma la turin thuneitu te a phut tlat a ni. Hemi kaihhnawiha dan bawhchhiatna hrang hrang thleng nia lang pawh chhuichhuaka, dan bawhchhetu te chunga an phu tawk hremna lekkawh ngei turin BIOCONE chuan thuneitu te a phut bawk. Sele sa chantu te manchhuah kawnga Young Lai Association, Lungzarhtum Branch te leh Mizoram Police te hmalakna hi BIOCONE chuan lawmawm a tiin, an inpêkna a ngaihlu takzet a ni. Ramsial/Sele hi ramsa vang tak, mang mai hlauhawm khawpa tlem tawh a ni a. India rama nungcha humhalhna danpui – Indian Wildlife Protection Act 1972 (IWPA) chuan ramsa humhalh ngai tawpkhawk (Schedule 1) zingah a dah a. Schedule I zinga ramsa peltu te hremna nep ber pawh “kum 3 tal Lung In tan leh pawisa chawi tir” a ni. Tin, ramsa taksa a mi engpawh lak, kawl leh zawrh te, finfiahna awm thei (evidence) tihchhiat te pawh ramsa peltu te nen ang khata hrem tur an ni bawk. Mizo culture-a hmun pawimawh tak luahtu, kan ramsial te hi mang maithei dinhmuna an din tak avangin Ram leh Hnam hmangaihna avang pawha kan humhalh leh zual a tul tak zet a ni. Lungzarhtum Sele hi mihring kut tuara thi ni ngeia rinhlelh a nih avangin, a thihdan chungchanga pawikhawihtu te manchhuahna kawnga pui theitu hnenah BIOCONE chuan lawmman atan pawisa fai, Rs. 10,000.00 (Cheng singkhat) a pe ang. Issued by Biodiversity and Nature Conservation Network (BIOCONE), Aizawl, Mizoram.

Share

colorboxloader