Nungchate hi leilung piantirh a ta khawvel lo luah lum hmasatu, mihringte ai pawh a Pathian in a siam hmasak zawk kha anni a. Hringfaten duat in enkawl thalo mahse Siamtu chuan an mahni tawk a in enkawl thei turin finna leh theihna anmahni ah hian a bilh tel tlat a,chuvangin an mahni chi theuh te lo inthlah pung a leilung hmun hrang hrang a insem darh thei khawpin anlo awm ve ta ani. Nimahsela leilung leh khawvel in her danglam leh mihringte nunphung in thlak danglam avangin nungchate dinhmun hi a him ta lova, ven him a enkawl an ngaih phah ta hial zawk ani.
Leilung inrelbawl danah eng thilnung mah hi mahni chi hlanga damkhawchhuah dan a awm lova, Pathian ruahman dan pawh ani hek lo. In ring tawn a, khawsa ho thiam mai tur kan ni. Nungchate hi uluk tak leh tha ti taka siam an nih avangin leilung zawng zawng chimpil thei tur khawp tuilet runpui a thlen pawh in an himna tur Pathianin Nova lawng a buatsaih a, Lirnghing, tlangkang, khawkheng , ruahsur lo thleng tur pawh anni chuan hriatlawk theihna annneih avangin an him tlangpui zel a, chu chu vawiin ni thlenga leilung ti thianghlimtu leh vawng thatu hi mihringte hian kan chhawr kumkhua lo thei lo.Chutianga an dam khawchhuah theihna thuthlung (Survival Policy) chu ram ropui leh sawrkar chakte pawhin an ngaihthah thei bik lova, ram changkang huasa a piangin an buaipui a India sawrkar ngei pawh in National Park leh Sanctuary te siam sak in an mahni humhalhna tur dan pui thlengin a buatsaih ta ani.
Ranvulh dangte ang bawkin nungchate hi buaipui ngaihna lai chin a tam mai,an damloh in damdawi eitir leh injection pek an ngai a, a chang chuan an hliam zai leh tuamsak thlenga a ngaih chang pawh a awm. Dan pangngaia no anneih theih loh leh tul bik thilah hmun him zawk a phurh sawn an ngai a, anni lah in chuti maia va khawih leh phurh sawn chu an duh der silo, hetiang hunah hian ramsate hi khuahkhirh a che theilo a siam ngaih chang a awm thin. Chutiang hna harsa leh bumro pui pui thawk a, sakei, savawm, sai leh rul turnei hmachhawn fotur chuan tam hneh ringawtin kawngro a su lova, chak leh rorumin awmzia a nei lova, rem hriat, tuanran leh tuarchhel ringawtin kori a tu hek lo. Hmanraw tha leh thiam thil a ngai a, training leh experience tha neih a tul thin.
Nungchate hi ramsa anni a, englai mah in zia an thlakin an inthup tak tak thei lo. Sahel ei chi chu a dam chhungin sahel eilo chuan a dam khawchhuak zo ngai lova, hnim hring ei chi ni turin a buatsaih theih hek loh.Chutiang bawkin hnim hring ei chi chu hnim hring awm lohna ramah chuan a dam thei hek lo.Ramsa ngang anni a, khawi hmunah pawh vulh in khawsa se an rilru an thlak ngai lova, an duhlo chung chu engti kawng mah a tihluih theih hek loh, an mahni tawkah chuan sa hlauhawm tak anni vek hlawm. Chuvangin an chungah eng pawh ti ila, hmangaihtu leh duattu hrethiam ve tak tak hek lo, an tlanchhiat loh vek chuan min beilet a, hetiang reng reng a mahni nunna chan huam a ramsa enkawl thin chu hna hautak tak leh buaithlak tak ani.
Ramsa khuahkhirh leh thunun(control) dan
Television channel tam takah miten ramsa an enkawl dan leh an man dan te kan hmu fo va, a bik in Discovery channel, National Geographic channel leh Animal Planet ah te hmuh tur a tam zual a, hetiang a ramsa, sava leh ranvulh te an thunun tlat dan hi Animal Restraint an ti a. Television lamahte hmu fo thin mah ila, Mizoramah mipui hmuh turin pho chhuah ani ngai meuh lo. Mizoram chhung, state dang leh ram pawnah ramsa tum 60 dawn lai kalo kah mut ve tawh atang a thil then khat han tarlang ila, hei hi Zoological Park a hna ka thawh chhung a ka hna hautak pawl tak pawh ani.
Physical Restraint
Damdawi tello, tharum leh hmanrua hmanga ramsa man beh tlatdan ani. Kut leh ke bakah hmawlh, tiang, len leh bawm hmanga ramsa kha khuahkhirh tlat tur ani. Hetiang hna hi a harsa a, chak leh remhriat a ngai a, huaisen leh tuan ran pawh a tul hle. Mihring leh ramsa tan chetsual a, inhliam, in seh tirte, ruhtliak lehruh pelh bakah ramsa leh mihring tan thih mai awl tak ani. Damdawi a ngai lova, hmanrua a ngai tlem a, a senso a tlem avangin hman mai awl tak ani.
Psychological Restraint
Hemi dan hmanga ramsate thunun thei tur chuan a zei mi leh tui mi hrim hrim nih a ngaih bakah training lak that viau pawh a ngai, ramsa ngam ve hrim hrim leh hrat lak peih tan a awlsam deuh. Ramsa che zia nun phung leh khawsak dan hriat chian a, an bula awm tam hle a ngai bawk. Ramsa taksa ah tharum leh hmanrua, damdawi chelek lovin, ngaihtuahna leh rilru sengin ramsa rilru kha thunun tlat tur ani. Hetianga ramsa thunun hi a har ber a, a tha ber bawk ani. Hetiang ang thiam mi hi chuan hrui hrual leh hmawlhte hmangin sai lian pui pui leh sakei te an duh duh an tih tir thei mai a, Chimpanzee leh Orangutan te pawh damdawi thip tak tak te an pemah an hnawih thei a, Gorilla pa lian el khen chi pawh artificial insemination atan an la thei mai thin.
Chemical Restraint
Ramsa kahmut kan tih mai thin Television a kan hmuh thin ang hi ani. NimahselaTV a kan hmuh a a awlsam hmel ang ngawt hi chuan a awlsam hauh lo, Helicopter atanga ramsa kahmut tum phei chu thil harsa tak anih avangin sa kap thin nazawng tan chuan zuam sual awl tak ani. Chuvangin a tih dan hriat hnuah pawh experience nei tha apiang in an ti fuh thei deuh. Damdawi hman a zir leh damdawi kah luh tam dan a zirin ramsate hi an mu rei hlei hle a, engpawh nise kan tih tur ang kan tih zawh velah damdawite hi a thahna (Antidote) pek vat a tih harh leh thuai tur ani.
Ramsa bawm chhunga khungbeh tawh te chu Blow pipe (ham bur) emaw, Jab stick emaw a awlsam taka tih mut mai theih anih laiin field zau leh thli tamna, thingtang leh hnim zinga ramsa awnte chu kahmutna syringe tibuai thei leh lo la peng thei tu atam avangin kah thelh leh tih sual a awl thin hle. Tin, eng hmanraw hmang pawhin ramsa kap mu dawn ila, mihring leh ramsa tana damdawi thahna Antidote hman mai theih a buatsaih sa a awm ngei tur ani a, vanduaina a thlen palh thut a hman nghal tur damdawi lam hre mi te, inbiak pawhna tha tak leh damdawi in pan mai theihna turin lirthei inpeih sa a awm ngei tur ani. Tin, damdawi hmanga ransa va kah veleh khan ramsate hi an mu nghal mai lova, damdawi hnathawh chhung (Induction time ) kha a awm thin avangin ramsa kah veleh a mu mai turin ngaih loh tur ani.
- Rifle Long range (Dics inject)
- Syringe projector Gas Rifle Mod 50
- Air pressure system for model 35 & 50
- Syringe projector Gas pistol model 35N
- Pistol
- Pneumatic Blow pipe
- Blow pipe
- Jab stick
- Pole Syringe
- Carbon Dioxide Gas capsule
- Hand / Foot pump
- Butane Gas
- Darting syringe (Metal and Plastic)
- Darting needles (Smooth & Barb)
- Stabilizer
- Plunger positioner
- Telescope
- Medicine
- Xylazine - 100 mg /ml
- Ketamin - 100 mg / ml
- Acepromazine
- Medetomedine
- Etorphine Hydrochloride (M99/Immobilon)
- Titelamide
- Batyrophenon
- Zolazepam
- Haloperodol
- Fentanyl
- Ilium Acepryl - 10
- Antibiotics etc.
Heng damdawi zingah hian Xylazine leh Ketamin hi khawvel ah an hmang tlang lawn ber a, Nimahsela ramsa kan kah tur a zir leh ramsa dinhmun a zirin damdawi hi hman thlak mai tur ani. Mizoram ah a bikin Sahuan hlui ramsa Bethlehem atanga Sahuan thar Sairang road, PTC Lungverh bula kan sawn lai phei kha chuan Xylazine leh Ketamin hi kan hmang uar hle a. Amaherawh chu Ramsate khan TB anlo vei hlawm avang leh Damdawite hian thawkna lam a tihbuai theih avangin Etorphine Hydrochloride hian kan thlak ta a, a fuh hle.
Etorphine Hydrochloride ( M 99 / Immobilon)
He damdawi hi tha tak, chak leh hlauawm tak ani a, Morphine aia a let 1000 a chak (Potent) anih avangin a neih dan leh a hman dan hi fimkhur a ngaiin a buaithlak hle a, far khat lek pawh mihring tan chuan hlauhawm tak ani. Nandankanan zoo a ramsa an kah mut lai pawh in forest officer pakhat ACF chu hriau huh alo khawih palh avangin nikhaw hre lovin a awm hmana, a nunna an chhan hman hlauh ani. He damdawi hi Novartis Animal Health Company United Kingdom in a siam a, chu chu Project Elephant (Govt. of India) in Sai kah mut nan a chah lut a, Central Zoo Authority rem tihna in Nandankanan Zoo, Orissa ah an kawl tha a, chu mi chu mamawh dan a zirin hman theih ani. He damdawi hi kum 2003 khan Mizoram a a vawi khat nan Orissa atangin ka zuk la a. He damdawi la lut tur hian Mizoram State a Drugs controller phal na leh Excise commisioner phalna lak ngei ngei a ngai a, chu phalna chu Central Zoo Authority, Orissa Excise Commisioner leh Orissa Drugs Controller ten an pawmpui hnuah Nandankanan atanga pek chhuah theih ani a, Chu mi la tur chuan a concern Veterinary Doctor chauh in ala thei nghe nghe ani
He damdawi hi a hlauh awm leh a chak em avangin hman dan pawh an fimkhur hle a, He damdawi hmannna tur hmunah hian tihsual palh a awm thilah medical duty, Tui thianghlim tam tawk, Antidote siamsa, Telephone leh ambulance te englaipawh in inring renga awm tura tih ani. He damdawi hi far khat lek pawh thihpui tham, far khat siper emaw hriau pang huh ringawt pawh taksa nen a a insik chuan nikhaw hrelova awm theih na anih avangin fimkhur tak a hman a ngai ani.
Dirt syringe siam dan
Ramsa kahmutna syringe hi metal leh plastic a awm a, syringe thenkhat phei chu automatic a siam ani nghe nghe ani. Kahmutna silai atanga syringe kan kah chhuah tur chu a syringe hma lam hmawr a needle invuah kha thawn tur ani a, chumi syringe chhunga rubber dum Planger kha syringe hnung lamah , a chanve velah nawr phei tur ani, tichuan needle invuahna syringe kua atang chuan kahmutna damdawi kha thun tur ani. Damdawi thun veleh needle kan thlawn tawh kha syringe hmawrah chuan vuah leh nghal tur ani. Needle hi injection na hriau dang angin a hmawrah a kaw ve lo va, a pang a a kua a awm avangin chu mi kua chu rubber sleeve in tih phui tlat tur ani. Hetia syringe kan siam hnu hi a hnung lam hmawr atangin Butane gas thun ve leh tur ani a, chu mi gas leh damdawi kha syringe chhungah a infin loh nan rubber plunger khan a daidang tlat bawk ang. Butane gas kan thun hian rubber plunger kha hma lamah a nawr phei ngar ngar a, mahse damdawi chhuahna tur ber needle pang kha rubber sleeve in a tihphui tlat avangin engmah chhuak thei lovin rei tak pawh a awm thei ani. Butane gas thun hnu hian syringe hnunglam hmawrah stabilizer (Pehbuk Sen) vuah leh tur ani a, hei hian silai atanga dart syringe kan kahchhuah kha a ti kal ngil thin ani. Tichuan silai atanga syringe han kah chhuah chiah khan syringe chu a thlawk phei ta a, ramsa tihrawl ava fuh chiah khan hriau panga rubber sleeve kha a tawlh phei ta a, butane gas awm khan rubber plunger chu hma lamah nawr phei in automatic in damdawi kha ramsa taksa ah a lut ta thin ani.
Ramsa kah mut hian a damdawi hman leh ramsa awmdan a zirin a thawh dan a danglam thei hle a, zing dai leh tlai lam te hi chhun khawlum lai ai chuan a tha zawk a, Ramsa hi hah lutuk emaw hlau leh thla bar tak a an awm emaw, ri bengchheng tam lutukah chuan an mu mai thei thin lo. Damdawi then khat chuan thawkna dawt a khawih tel theih avangin ramsa TB vei leh thawk kawng thalo chu thawchham in an thih phah der thei a, hnim hring ei chi ruminant animals ah te phei chuan an chaw eipuar laia kah mut chu an nunna ven zawh loh mai awl tak ani. Zawng ka kahmut tirh lam kha chuan zawng hian kahmutna syringe kha an mut hilh hma in an seh chhe fo thin a, a chang chuan kah veleh an lo phawi vat a, damdawi a chik chhuah zawh hma in midang taksa a an vih luh leh chang pawh a awm fo mai. Chuvangin kan hriau hman turte pawh hi a ki bar (Barb) nei leh neilo a awm a hman hun hriat pawh a tha hle
Engpawh nise ramsa kah mut chhan tha tawk tak leh tih tur pawimawh tak a awm anih loh chuan tih loh tur ani a, hliam en kawl tur emaw, injection pek ngai emaw, zai ngai emaw leh phurhsawn dawn emaw te anih chauh in tih thin tur ani. Chutiang huan kan kapmu alo nih pawh in kan tih tur kan tih zawh veleh damdawi thahna pek vat a tih harh leh vat tur ani. Ramsa kahmut hi hna hautak leh khirhkhan tak anih avangin a man a tova, senso a sanga, damdawi leh hmanrua te hi foreign atanga lak luh anih tlang pui avangin vawi khat kah hi kan fuh emaw fuh lo emaw cheng sang nga bawr vel chu sen a ngai deuh ziah ani. Tin,kan ramsa kah kha sazuk , sakhi ang velte anih chuan an mut hilh chhungin pumpuar anneih ran em avangin a bawk khup a dahte a ngai a, chutih lain sai te chu an mut hilh chhungin a bawkkhup zawng a kan dah chuan a hlauhawm le hem em bawk thin. Chuvangin Sail eh Samak kahmut hi ka telve tawhna ah chuan ala hau tak ber mai.
- Log in to post comments
